ဆၣ်မုၢ်ထီၣ်ကညီဘျၢထံခရံာ်ဖိတၢ်အိၣ်ဖှိၣ်တချုးကဲထီၣ်အသးဒ်ဘၣ်န့ၣ် ဖဲ ၂ဝဝ၆ နံၣ်အကတီၢ်ပှၤကညီဖိလၢအဟဲအိၣ်ဆိးဖဲ New Bern အပူၤသ့ၣ်တဖၣ်ပာ်ဖှိၣ်ထီၣ်အသးစှၤဒူၣ်စှၤဂၤ ဒီးနွံမ့ၢ်ဘၣ်ဘူၣ်သကိးဘါသကိးယွၤဖဲသရၣ်ကီၢ်မုၢ်ထီၣ် အဟံၣ်ဒီးတဘျီဘျီ ဟးဘါသကိးယွၤလၢဟံၣ်တဖျၢၣ်ဘၣ်တဖျၢၣ် ပှဲၤထီၣ်စ့ၢ်ကီးတနံၣ်န့ၣ်လီၤ

ဖဲ ၂ဝဝ၇ နံၣ်အဆၢကတီၢ်, ခီဖျိလၢပှၤကညီဟဲအါထီၣ်အဃိ, ဒီးဖဲန့ၣ်အဝဲသ့ၣ်ပာ်ဖှိၣ်ထီၣ်အသးဒီးလဲၤဘါသကိးကဒီးယွၤလၢဒီပုၢ်ဝဲၢ်ကိၤလၤဝါသ့ၣ်တဖၣ်အသရိာ် လၢအမ့ၢ် မဲၣ်သဒ့းတၢ်ဘါယွၤသရိာ် (Methodist Church) န့ၣ်လီၤ မၤကဒီးဖဲ ၂ဝဝ၇ နံၣ်ဒံၤစဲဘၢၣ်အပူၤန့ၣ် သရၣ်ဒိၣ်ထူလ့ၤဒွ့ဟဲတုၤဒီး, သရၣ်ဒိၣ်ဒီး ဖံခူၣ်ခံဒီး သရၣ်လါန့ၢ်သါ အဝဲသ့ၣ်တဖၣ်တဲသကိးတၢၣ်ပီၣ်သကိးလိာ်သးဒီး ကျဲၤသကိးဝဲလၢ ထဲဖၢၣ် တၢ်ဘါယွၤသရိာ်ဒ်သိးကန့ၢ်လဲၤဘါသကိးဘၣ်ယွၤဒီး တၢ်အိၣ်ဖှိၣ်ဖဲန့ၢ်ဒီး ဒိးန့ၢ်ဘၣ်တၢ်ခွဲးတၢ်ယာ်ဂ့ၤဂ့ၤဘၣ်ဘၣ်လီၤ

ဖဲ ၂ဝဝ၈ နံၣ်န့ၣ် ကညီခရံာ်ဖိဖဲဝ့ၢ် New Bern တဖၣ်ပာ်ဖှိၣ်ထီၣ်သး ဒီးလဲၤဘါသကိးယွၤလၢ Temple တၢ်ဘါယွၤသရိာ်ဒီး အဝဲသ့ၣ်ကဲထီၣ် Temple အတၢ်အိၣ်ဖှိၣ်ဖိ, ဒီးဘါသကိးယွၤဒီး ကီၤလၤဝါတပူၤဃီ, တကတီၢ်ဃီန့ၣ်လီၤ ဒီးလၢခံက့ၤမး ဒိးန့ၢ်ဘၣ်တၢ်အခွဲးအယာ်လၢန့ၢ်ဘါဘၣ်က့ၤယွၤ, ဖဲအိၣ်ဘှံးနံၤ ဟါခီ ခံနၣ်ရံၣ် ထဲဒၣ်ပှၤကညီဖိန့ၣ်လီၤ အဆၢကတီၢ်ဖဲန့ၣ်, သရၣ်ဒိၣ်ထူလ့ၤဒွ့ကွၢ်ပှၤကညီအတၢ်အိၣ်ဖှိၣ်ဖဲ ထဲဖၢၣ် သရိာ်ဒီးမ့ၢ်ဒ်ကညီဘျၢထံခရံာ်ဖိတၢ်အိၣ်ဖှိၣ်သရၣ်တဂၤအသိးန့ၣ်လီၤ

ဖဲ ၂ဝဝ၈ — ၂ဝဝ၉ နံၣ်အဆၢကတီၢ်တၢ်အိၣ်ဖှိၣ်အံၤဘၣ်တၢ်တီခိၣ်ရိၣ်မဲ, ဖီၣ်ဂၢၢ်ဖီၣ်ကျၢၤ, ဟံးစုနဲၣ်ကျဲဒ်အမ့ၢ် သရၣ်ဒိၣ်ထူလ့ၤဒွ့ တၢ်အိၣ်ဖှိၣ်သရၣ်, သးပှၢ်မုၣ်လါစ့, စံၣ်စိၤနုာ်စီၤဆၣ်ဂ့ၤဒိၣ်ပျဲၢ်ထံ, သရၣ်မုၣ်လဲးဖိဒီး ခိၣ်နၢ်အဂုၤအဂၤသ့ၣ်တဖၣ်, ဒီးတၢ်အိၣ်ဖှိၣ်အံၤဘၣ်တၢ်ယုၢ်အမံၤလၢ (KCU) ဒ်အမ့ၢ်ကညီခရံာ်ဖိတၢ်ရ့လိာ်မုာ်လိာ်န့ၣ်လီၤ

ဖဲ ၂ဝဝ၉ — ၂ဝ၁ဝ နံၣ်န့ၣ်ခီဖျိလၢ KBCUSA အိၣ်ထီၣ်လံအဃိ, တၢ်အိၣ်ဖှိၣ်အံၤဘၣ်တၢ်စံၣ်ညီၣ်အၢၣ်လီၤ, ဒီးပာ်ဂၢၢ်ကျၢၤက့ၤအမံၤလၢ ဆၣ်မုၢ်ထီၣ်ကညီဘျၢထံခရံာ်ဖိတၢ်အိၣ်ဖှိၣ်န့ၣ်လီၤ ဖဲလါနိၤဝ့ဘၢၣ် ၁၆ သီ, ၂ဝ၁ဝ နံၣ်န့ၣ်, သရၣ်ဒိၣ်ထူလ့ၤဒွ့ပာ်တ့ၢ်ကွံာ်ဒဲဟီၣ်ခိၣ်ဝံၤအလီၢ်ခံ, သရၣ်အဲလၢာ် (Pastor Allen) ကွၢ်က့ၤတၢ်အိၣ်ဖှိၣ်အံၤထဲ သၢလါ ခီဖျိလၢအဝဲဘၣ်သုးလီၢ်သုးကျဲဆူ ထဲးစဲး (Texas) အဃိ သရၣ်မါရှၢၣ် ကွၢ်ပတြီၤပာ်တၢ်အိၣ်ဖှိၣ်အံၤန့ၣ်လီၤ

ဆၣ်မုၢ်ထီၣ်ကညီဘျၢထံခရံာ်ဖိတၢ်အိၣ်ဖှိၣ်ဘၣ်တၢ်ပာ်ဂၢၢ်ပာ်ကျၢၤ, ဒီးပာ်ပနီၣ်စ့ၢ်ကီးအီၤလၢကီၢ်အမဲရကၤပဒိၣ်ဒ်တၢ်အိၣ်ဖှိၣ်တဖုအသိး, ဖဲလါအီးကထိဘၢၣ် ၉ သီ, ၂ဝ၁၁ နံၣ်ဒီး နံၣ်အဝဲန့ၣ်ကညီဖိလၢအနုာ်လီၤမၤသကိးတၢ်ဒီး တၢ်အိၣ်ဖှိၣ် ထဲဖၢၣ် သ့ၣ်တဖၣ်, ဘၣ်တၢ်ဆှၢက့ၤအဝဲသ့ၣ်အမံၤခဲလၢာ်ဆူဆၣ်မုၢ်ထီၣ်တၢ်အိၣ်ဖှိၣ်အပူၤ, ဒီးဆၣ်မုၢ်ထီၣ်တၢ်အိၣ်ဖှိၣ်ဆၢထၢၣ်ဒ်တၢ်အိၣ်ဖှိၣ်တဖုအသိးန့ၣ်လီၤ

ဆၢကတီၢ်ဖဲန့ၣ်ပှၤလၢကွၢ်ပတြီၤပာ်စၢၤတၢ်အိၣ်ဖှိၣ်မ့ၢ်ဒံးဒၣ် သရၣ်မါရှၢၣ်န့ၣ်လီၤ ၂ဝ၁၆ နံၣ် နံၣ်ခီၣ်ထံးဒၣ်လဲာ်တၢ်အိၣ်ဖှိၣ်သရၣ်တအိၣ်ဒံးဘၣ် အိၣ်ဒံးဒၣ်သရၣ်စၢၤ ဒ်အမ့ၢ်, သရၣ်အဒံန့ၣ်လီၤ ဒီးအဆၢကတီၢ်ဖဲန့ၣ်သရၣ်မါရှၢၣ် ဒီးသရၣ်အဒံခံဂၤဆှၢသကိး တၢ်အိၣ်ဖှိၣ်အံၤတုၤလၢ, လါမ့ၤ ၁ သီ ၂ဝ၁၆ နံၣ်န့ၣ်တၢ်အိၣ်ဖှိၣ်ဖိသ့ၣ်တဖၣ်အၢၣ်လီၤတူၢ်လိာ်ဝဲလၢ, သရၣ်အဒံ ဘၣ်တၢ်ပာ်ဂၢၢ်ပာ်ကျၢၤအီၤဒ်အမ့ၢ်ဆၣ်မုၢ်ထီၣ်ကညီဘျၢထံခရံာ်ဖိတၢ်အိၣ်ဖှိၣ်သရၣ်တဂၤအသိးန့ၣ်လီၤ

မ့မ့ၢ်တၢ်အိၣ်ဖှိၣ်သရၣ်စၢၤ, သရၣ်ဟါရ့ၣ်မူန့ၣ်, ဘၣ်တၢ်ဃုထၢပာ်ဂၢၢ်ပာ်ကျၢၤအီၤဖဲ ၂ဝ၁၇ နံၣ်န့ၣ်လီၤ

ဖဲ အီးကထိဘၢၣ် ၂၁ သီ, ၂ဝ၁၈ နံၣ်န့ၣ်, သရၣ်အဒံဒီး သရၣ်မါရှၢၣ် ခံဂၤဘၣ်တၢ်ဟ့ၣ်အါထီၣ်မူဒါဒ်သရၣ်ပာ်စုအသိးန့ၣ်လီၤ

ဆၣ်မုၢ်ထီၣ်တၢ်အိၣ်ဖှိၣ်အံၤစးထီၣ်လၢ ၂ဝ၁၇ နံၤတုၤလၢ ၂ဝ၂၁ နံၣ်န့ၣ်သရၣ်လၢအမၤသကိးတၢ်လၢတၢ်အိၣ်ဖှိၣ်တဖုအံၤအိၣ်သၢဂၤ, သရၣ်ဒိၣ်အဒံ တၢ်အိၣ်ဖှိၣ်သရၣ်, သရၣ်ဟါရ့ၣ်မူ သရၣ်စၢၤ, သရၣ်ဒိၣ်မါရှၢၣ် သရၣ်ဒိးတၢ်ယူးယီၣ်သ့ၣ်တဖၣ်န့ၣ်လီၤ.
ဆၣ်မုၢ်ထီၣ်တၢ်အိၣ်ဖှိၣ်အတၢ်သူၣ်ထီၣ်ဒီးအတၢ်ပညိၣ်ကွၢ်စိမ့ၢ်ဒ်သိးတၢ်အိၣ်ဖှိၣ်ကအိၣ်ဒီးအသူးအသ့ၣ်အလၤကပီၤ တၢ်မ့ၢ်တၢ်တီတၢ်စီတၢ်ဆှံဒီး တၢ်အိၣ်ဂၢၢ်ဆိးကျၢၤလၢဖိလံၤတစိၤဘၣ်တစိၤ ဒီးမ့ၢ်ဒ်သိးတၢ်သးခုကစီၣ်ကမူထီၣ်ဂဲၤထီၣ်အဂီၢ်စ့ၢ်ကီးန့ၣ်လီၤ တၢ်အိၣ်ဖှိၣ်အံၤဘၣ်တၢ်ကိးအမံၤလၢ ဆၣ်မုၢ်ထီၣ်ကညီဘျၢထံခရံာ်ဖိတၢ်အိၣ်ဖှိၣ် (Karen Baptist Church of New Bern) ဒီးတၢ်အိၣ်ဖှိၣ်တၢ်တိာ်ထူ (မးသဲ ၆း၉,၁ဝ) နဘီနမုၢ်န့ၣ်မ်အဟဲတက့ၢ်, ဒ်လၢမူခိၣ်အသိးန့ၣ်မ်တၢ်မၤအသးလၢဟီၣ်ခိၣ်ချၢစ့ၢ်ကီးဖဲဒၣ်နသးတက့ၢ်. ဆၣ်မုၢ်ထီၣ်ကညီဘျၢထံခရံာ်ဖိတၢ်အိၣ်ဖှိၣ်, အတၢ်ဘျးစဲ, ဘၣ်ထွဲစ့ၢ်ကီးအသးဒီးမုၢ်ထီၣ်ကလံၤထံးကဝီၤ (East Coast South) ဒီးကရၢမိၢ်ပှၢ် (KBCUSA) ဒီးဘျၢထံခရံာ်ဖိကရၢအဂုၤအဂၤလၢအတၢ်စူၢ်တၢ်နာ်လၢလီၤပလိာ်, လိာ်အသးသ့ၣ်တဖၣ်န့ၣ်လီၤ. ဆၣ်မုၢ်ထီၣ်ကညီဘျၢထံခရံာ်ဖိတၢ်အိၣ်ဖှိၣ် ပၢဆှၢတၢ်ကမံတံာ်အိၣ်စ့ၢ်ကီး ၅ ဂၤ, ဒီးတၢ်အိၣ်ဖှိၣ်အံၤအိၣ်သူၣ်လီၤအသးလၢ, ဝ့ၢ်နညူဘၢ (New Bern) နီၣ်ခဲၤရိၤလဲနါ (North Carolina ) ကီၢ်စဲၢ်, န့ၣ်လီၤ.
တၢ်အိၣ်ဖှိၣ်အံၤလၢတၢ်မၤသကိးတၢ်အပူၤ, အိၣ်ဒီးအက့ၢ်အဂီၤလၢလၢပှဲၤပှဲၤဒ်အမ့ၢ်, တၢ်အိၣ်ဖှိၣ်သရၣ်, ဖှိၣ်စၢၤသးပှၢ်, ပၢဆှၢကမံတံာ်, ပိာ်မုၣ်ကရၢ, ကျဲးစၢးကရၢ, ဒီးအိၣ်ဘှံးနံၤကၠိဖိသ့ၣ်တဖၣ်န့ၣ်လီၤ